Алматы облысының фермерлері агро-порталмен танысты

10 сәуірде Алматы облысы, Көксу ауданының фермерлері мен ауылдық округтерінің әкімдері семинар-тренингте бас қосып, алғашқы отандық агро-портал "аgrobiz.kz"-тің қызметімен таныстырылды.

"Бізге семинар туралы хабарлағанда теріс ойда болғанымды жасырмаймын. Бұл, әдеттегідей, елеулі пайдасы жоқ, есеп беру үшін ғана жасалатын көп жиынның бірі деген ойда болдым. Алайда жобаны таныстырғаннан соң, біздің фермерлеріміз үшін аталған ресурсты пайдаланудың қаншалықты оңай және қолжетімді екенін көзбен көрген соң, бастапқы пікірім өзгерді", - деп семинар соңында Балпық ауылдық округінің әкімі Қалиева Әлия Әбуқызы өз пікірімен бөлісті.  

Шараны ұйымдастырушылардың сөзі бойынша, келешекте портал Қазақстанның барлық өңірлерінің фермерлері мен ауылдық округтерінің бірыңғай деректер қорына айналуы тиіс.

Агро-портал USAID-тың қаржыландыруымен жүзеге асырылып жатқан "Тиімді басқаруды қолдау бастамасы" бағдарламасы аясындағы "Қазақстан фермерлері"  жобасының шеңберінде құрылды. "Қазақстан фермерлері" жобасының командасы Оңтүстік Қазақстан және Жамбыл облыстарында да жұмыс жүргізуді жоспарлап отыр.