Балқашта «Balkhash STEAM Serpini» жобасы басталды. Бұл балалар мен жастардың дамуына қалай көмектеседі?

29 тамызда Балқашта ынтымақтастық туралы Меморандумға қол қойылып, жаңа оқу жылына арналған «Balkhash STEAM Serpini» білім беру жобасының ресми іске қосылуы өтті. Іс-шара Мағауи Хамзин атындағы Металлургтер Мәдениет сарайында өтіп, жергілікті билік, білім беру мекемелері мен БАҚ өкілдерін жинады.

«Balkhash STEAM Serpini» жобасы Балқаш қаласының оқушылары арасында STEAM (ғылым, технологиялар, инженериялық іс, өнер және математика) дамуын көздейді. STEAM — бұл оқушылардың тәжірибелік қабілеттерін, сыни ойлауы мен тапсырмаларды шығармашылық тұрғыдан орындауын дамытатын оқытудың тәсілі. «Serpin» атауы жоба қаланың білім беру жүйесінің дамуына  берілетін серпінді білдіреді.

Жоба «Коунрад» Корпоративтік Қорының бастамасы болып табылады және Орталық Азияның Еуразия Қорымен іске асырылады. Жоба аясында қазірдің өзінде  айтарлықтай жетістіктерге қол жеткізілді. Мәселен, 19-29 тамыз аралығында Балқаштан келген 46 педагог өңірдің ерекшеліктерін ескере отырып, жоба үшін арнайы әзірленген STEAM-бағыттарда біліктілікті арттырудың қарқынды курстарынан өтті. Бағдарламалар бес негізгі бағытты қамтыды: бағдарламалау, робототехника, экология, инженерия және Зерттеулерден жобаларға дейін. Қыркүйек айынан бастап мұғалімдер алған білімдерін элективті курстарда қолдана бастайды, бұл оқушылар арасындағы білім сапасын арттырып қана қоймай, оқу процесін қызықты әрі практикалық етеді.

«Маусым айында біз теориялық дайындықтан өттік, ал тамыз айында STEAM бойынша ұлттық сарапшылармен тәжірибе бастадық. Практикалық сабақтарда барлық мұғалімдер креативті оқу тапсырмаларын ойлап тапты, мысалы, қайта өңделетін заттармен эко пакет жасау. Оқушыларға тапсырма ретінде бізге келген тағы бір идея — 2GIS қосымшасы арқылы қаланың қоқыс алаңдарын талдау. Оқушылар деректерді жинай алады, диаграммалар жасай алады және ластанудың себептері мен деңгейлері туралы қорытынды жасай алады. Бұл тапсырма математика мен физика элементтерін қамтиды, сонымен қатар экологиялық білім беруді дамытады. Біз осындай жобалардың үлкен әлеуетін көріп отырмыз және оларды одан әрі дамытуды жоспарлап отырмыз, тек жаңа идеяларды ғана емес, сонымен қатар қаламыздың балаларының әлеуетін дамыту үшін», — «Менің өңірімнің экологиясы» курсынан өткен Әлімхан Ермеков атындағы мектеп-лицей КММ мұғалімі Ольга Почтарь дейді.

Сонымен қатар, Балқаштың жеті мектебі 682 500 теңгеден грант алды. Бөлінген қаржыландыру балалардың жаңа пәндерді іс жүзінде үйренуі және өз жобаларын құруы үшін оқытудың жаңа технологиялары мен әдістерін енгізуге жұмсалады. Гранттар Сараптамалық қазылар алқасының қатысуымен өткен ашық конкурс барысында бөлінді. 

«Бұған дейін біз Атырауда ірі STEAM-жобаны сәтті жүзеге асырдық және балалардың дағдыларын дамытуда ғана емес, олардың өзіне деген сенімділігін арттыруда да зор нәтижелерді көрдік. Біз «Balkhash STEAM Serpini» жобасы оқушыларға өз әлеуетін ашуға және болашақтың сенімді көшбасшысы болуға көмектесіп, Балқашта осындай табыстар әкеледі деп сенеміз», — деп атап өтті ОАЕҚ білім беру бағдарламаларының директоры Салтанат Ноғайбаланова.

Іс-шара бағдарламасында сөз сөйлеу, мектептер мен мұғалімдерді марапаттау, сондай-ақ педагогтар арасында жобалар байқауы өткізілді. Байқау Балқаш мұғалімдерінің жаңа білімді қолдануға және оны оқушылармен бөлісуге дайын екендігін көрсетті.

«Balkhash STEAM Serpini» жобасы — бұл жаңа білім беру бастамасы ғана емес, Балқаш жастарының дамуына маңызды қадам. Білім беруге инвестиция сала отырып, жоба бастамашылары балалардың және бүкіл қаланың болашағына инвестиция салады. STEAM-білімінің арқасында Балқаш оқушылары тек Қазақстанда ғана емес, халықаралық аренада да бәсекеге қабілетті бола алады.

«Коунрад» қорының өкілдері мұндай жобалар Балқаштың озық білім беру практикасын енгізуі үшін жағдай туғызатынын, ал жас ұрпақ болашақта оның табысы мен өркендеуіне ықпал ете отырып, өңірдің экономикасын дамытып, нығайта алатынын атап өтті.